26 December 2013


ماتقولي ازاي احبك حب يرضيك بوس ايدك..انا تعبت 

20 December 2013

عبط


انا مش بحب الشاي يمكن اشربه لما اكبر بس برضه هفضل مش بحبه,,مش بحب الشتا عااا مش بحب الشتا ات اول,,مش بحب اروح اماكن جديده لوحدي,,مش بحب اروح اماكن جديده اصلا بس بروح طول الوقت
مش بحب الناس اللي مابتظهرش ف وقتها ,,و الناس المزيفة ,,والناس اللي بتمشي فجأه,,مش بحب مشروع ليلي من قبل حتي ماسمعهم ,,مش بحب دكاترة التصوير كلهم كلهم معاده دكتور سرور,,مش بجب لا بكره انا بكره الواتس اب ومقتنعه انه بيبعد الناس اكتر مابيقربهم كفاية انك مابتسمعش صوت الناس اللي بتحبهم و بتفرح بشوية كلام مافيهوش روح,,
بطلت احب المترو,, بطلت اكل شوكولا,,بطلت اهتم البس ساعه,,بطلت ابص ف الساعه,,مابقتش احب اشحن موبايلي و بتعمد اسيبه يفصل وانسي اشحنه,,مع اني بكره الارقام الغير متاحه,,بكره الزن و الكدب بكل الوانه,, مش بحب النوم و بالذات لو ضروري انام عشان هصحي بدري,,
مش بحب المكرونة بالصلصه ,,مش بحب الصلصه اصلا,,مش بحب اكل مش بتحمس اكل وبالذات لو الاكل مش معمول بفن,,بكره الشر المعلن و المستتر,, والمسلسلات,,بكره الادوية و بتعمد انساهم رغم ان شنطتي مليانه ادوية ,,ب
كره هند اللي انا بقيتها بس متعايشه مع الموضوع ,,بكره شهر ديسمبر عشان ديسمبر بيحب الشتا و الشتا بيموت الاحلام ,,بكره الدواير و اللف و الدوران ,,بكره اني بقيت ابدو برده رغم اني باكل ف نفسي طول الوقت ..
اعتقد قلبي بقي اسود كده من كميت الحاجات اللي قررت احدد علاقتي بيها وطلعت بكرها..

19 December 2013

طمني

الكتابة هي وسيلة التفريغ الوحيده اللي لسه باقيه
عشان كده لازم احاول اكتب
الحياة بشكل عام بقت ابرد من الجو
عارف في فرق كبير اوي بين انك تحافظ علي حد و انك تحتفظ به
وانت مش محافظ عليا ولا حتي عارف تحتفظ بيا..
انا خاب ظني ف كل البني ادمين
اهديلي قصيدة ايزيس ,,او احفظها وقولهالي ,ممكن تكتبهالي كمان ف جواب
انا نفسي حد يكتبلي جواب ..
انا مش لايقه علي الشتا
انا بكره الشتا ..
امشي يا صداع ,,سيبني يا صداع
نايمه ف السرير بقالي تلات ايام بدور علي سبب واحد مقنع يخليني اقوم من السرير ..مش لاقيه
انا ماليش لازمه ف العالم و متصلحه جدا مع الفكره دي عشان اصلا العالم مالوش اي لازمه
المعضله الحاليه تكمن ف اني ازاي اقولك افضل , وانت اصلا مش هنا !
لما تكلمني بعد كتير تسال عليا هتفتكرني مرهقه عشان كده نايمه بقالي كتير
ومتعرفش اني نايمه بقالي كتير عشان خايفه..
لما بلاقيني مستنياك تكلمني بروح اقفل الموبايل ,,عشان بخاف من احتياجي ليك
عشان غالبا لما بحتاجك مش بطمني كفاية او مش بطمني خالص..

18 December 2013

عدد الحاجات اللي بكتبها وامسحها ف ازدياد مرعب
انا مش عارفه  اكتب ..
يمكن محتاجه حد يهبدني جامد ف كل الكلام المتخزن والعياط المتحوش يطلع
يمكن ..
مع اني بطلت اعرف انفجر واطلع كل حاجه
وبقيت ببساطه بسكت واكل ف نفسي ..

17 December 2013

افضل اقاوم ,,مرضاش اسيب نفسي ,,احط فاصل  وخيوط حرير حاده اسيب مسافات
بس ديما اللحظة اللي بطمن فيها بتتزامن مع اني بفقد كل حاجة ..

محاولة استسلام


ماشية بدور ف الاغاني و الافلام والروايات و الحواديت عن حد يقول حاجه تأكد الاحساس 
الغير مفهوم اللي انا حساه بس مش لاقيه ..
ولاني مش عارفه انا حاسة باية بالضبط ..فانا تايهه
و مش مهتمه ..
"اللي هيحصل ..هيحصل" صح ؟
اسيب مسافة احط فاصل وعقبات صغير الف نفسي بخيوط حرير حاده
واكش وانكمش جوايا كل ماحس انك بتقرب عشان خايفة تدوس ع الوجع تاني
بس ديما في اللحظة اللي بغفل فيها وبطمن وبكل بساطه اسيب نفسي,,بتضيع مني
بتغافلني وتتسرسب من بين ايديا زي حبات رمل في مصفي عيونها  واسعه

و المره دي انا خايفة ..انا مرعوبة عشان عارفه ان روحي مابقتش واسعه وشفافه زي قبل كده
بس كفاية زق ف الحاجات عشان تحصل ,,وجري منها عشان متحصلش
"اللي هيحصل..هيحصل"
استسلمي كفاية عناد ومقاوحه
"اللي هيحصل ..هيحصل"
اطمني..وغمضي عينيكي ونامي عشان مهما حصل ..هو اللي كان هيحصل ولا شئ غيرة..

11 December 2013

زي قشر اليوستفندي/
ريحته تفضل فى الإيدين../
والموسيقى التصويرية../
اللي لما الفيلم يخلص/
مش ناسيها/
زي خط شنب صناعي/
باقى من «مج» الكاكاو/
زي لما بفتكرلك جملة حلوة/
انتي شايفاها عادية/
زي لما بتسألينى/
عن حاجات هبلة ما بينا/
«لسه فاكر؟»/
زي لما دخلنا سينما/
واحتفظنا بالتذاكر/
زي إيه تاني في حياتنا/
أقدر أوصف بيه شعوري بالدفا/
أصل هو شعور معقد/
بس مافهوش فلسفة/
لجل ذلك../
تسمحيلي لما تِشتي/
نمشي سوا تحت المطر

حكاية مؤجلة

لما اعرف اشوفك بعد غياب طويل ,,اقعد قدامك .,,احكيلك  قصص هبله كتير ,,احكيلك عن انجازاتي الصغيرة .,,بعد وقت قليل ببقي حاكتلك كل حاجه فاتت من اخر مره شوفتك وخلاص مش عارفه اقول ايه
ديما بتسرح في عنيا اوي  انا اللي ماكنتش تعرف تبص لحد في عينية ثانيتين علي بعض علمتني افضل بصه ف عنيك واحكيلك عن اسرار هبله مش عارفه اقولهالك مش ديما بتعرف تقراني او بتعرف بس مش بتقولي كل اللي عنيا قالته
وتسألني مش عايزة تقوليلي حاجه عنيكي فيها كلام كتير
جايز المره دي اقولك واحكيلك مشكلتي ديما مع البداية اول الكلام ,,
عايزة احكيلك عن الوجع
محتاجة احكيلك عن الوجع..بس مش انهاردة.

10 December 2013

انا مش فاكره ازاي كنت مبهجه ومبتهجه كده ,,وازاي روحي كانت طايرة طول الوقت كانها بالونه هيليوم ,,ازاي الالوان كانت ديما بتغريني,,روحي ازاي كانت واسعه كده ,,ازاي الكلام و الفضفضه كانو حاجه سهله و الكتابه كمان ,,كنا دوشة مزعجين بنتكلم بنضحك كنا مليانين بالحياة و فجأه اطفينا
حقيقي معرفش ازاي كل ده حصل علي غفله مني




اللعنة علي خيال كان سوداويا تحول الي حقيقة .. اللعنة علي توقعات تطأ ارض الواقع في غفلة مني...اللعنة علي مصائب لاتجيد اختيار اوقات الزيارة.. !!*

25 November 2013

الحب هو نبرة الازبهلال ف صوت على الحجار ف أول مقطع ف أغنية عارفة..لما بيكتشف فجأة انه متونس بيها وكإنها من دمه..وعلى راحته معاها كإنها أمه..إزبهلال الاكتشاف الأول والخضة بتاعة "يا خبر اسود دة انا بايني بحبها بجد" ثم تغيير النبرة ف المقطع اللي بعده على طول لما المزيكا بتدخل..صوته المبسوط انه اكتشف الاكتشاف دة..وتكراره لنفس الاكتشاف بنبرة مطمنة وواثقة..ثم يقينه ان الإحساس دة صح فيبتدي يسهب في شرح موقفه وإحساسه بيها طول الأغنية إندهاشه من كل الأحاسيس المختلطة اللي فجأته تماماً ومكانش عامل حسابها وبيأكد على دة وهو بيقول "مش عارف ليه..مش عارف ليه" إندماجه في الاندهاش وارتداده لحالة الازبهلال الطفولية بيخليه يقول تشبيهات غاية في البراءة زي انه يكون شايف العالم مفيهوش ولا "نقطة" أحزان إيدك خليها ف إيدي..أنا طفل كبير ‫#‏قواعد_العشق_الأربعون_بتاعتي_هع‬

23 November 2013

عسر هضم ف دماغي


بقالي 3 ايام بحاول اكتب بحاول اشتغل او اتكلم او اخرج او ارقص او حتي اتمشي ,,مش عارفه انام ومش عارفه افوق
مبعملش اي حاجه غير اني قاعده جمب الشغل اعيط واشرب ف نسكافية وقهوة بكميات مهوله ومستنيه الوحي يجي او الاحباط يمشي..
 انا تعبت مني,,ومش عارفه اعمل فيا ايه ..
ومش فاهمه ايه كم الارهاق النفسي و الجسدي و الفكري اللي عندي ده..

22 November 2013

نسمع الوعود ونقاوم بعزم ما فينا عشان منصدقهاش مهما كنا خايفين ومحتاجين حاجه تطمنا
منصدقهاش بس ماننسهاش
عشان في يوم زي ده هنحتاج نفكر نفسنا بيها و نحمد ربنا الف مره اننا ماسبناش نفسنا نصدقها وان قد ايه احنا كان معانا حق ..!

سلام علي كل من ثارو وقاتلو واستشهدو في صمت ... سلام علي كل من مر من محمد محمود 

21 November 2013

مش عارفه ابطل احاول اهرب ,,وفي نفس الوقت محاولات الهروب كلها مؤخرا بقت بتفشل فشل زريع..
تتجسد مخاوي كلها في كوابيس ,,فقاوم النوم بالقوة الباقيه عندي
واصوات الناس اللي بتدخل في الحلم وتفضل تقولي اهرب
اصحي مخنوقه ومخضوضه 

20 November 2013

بتمني في كل لحظة في كل يوم اني ارمي كل حاجه اسيب كل حاجه واهرب افضل اجري اجري لغاية مانفسي يتقطع فاوصل لمكان معرفوش واتوه ومحاولش ارجع ..

12 November 2013

#عن

-both
عن الهروب المستمر والامل ف ان الملل وكتر الوجع يموت الحاجات جوانا
والاكتشاف اللي مش جديد ان تكرار الوجع مش بيهونه ده بيوجع الوجع اكتر..
عن الحلاقات المفرغه  اللي لا بتقدم ولا بتاخر
ماشين فيها
,,متمسكين بيها بدون سبب 
ولان احنا عرفين اننا بندور مابنتفجأش لما الحكايات تتكرر
ف بنستخدم ايموشن واحد لكل المواقف (فيس الموتي الاحياء)
عن الشوق المكبوت وكبت الكبت بكبت اكبر 
فتحس انك هتنفجر
بس الحقيقه انك عمرك ما بتنفجر لكن بتعيا عيا الزعل..
عن الوحده مع صحابي اللي انا صاحبتهم اكتر ما هما صحابي
ومع صحابي اللي هما صحابي اكتر ما انا صاحبتهم 
وعدم القدره علي تحقيق معادلة اني ابقي صاحبة حد صاحبي 
عن التوهان بتوه كل لما بتسمحلي الفرصه 
يمكن الاقي مكاني اللي بنتمي له
شارع جديد معرفوش يحبني مثلا
عن الكلام المتخزن اللي ساعات بتجرب تطلعه وكالعاده بتفشل
فتخرج منك كلمات متنتوره عن الوجع و الوحده و الفقد
بس محدش بيفهمها 
ف تسكت
ف تبهت
عن القهوة قهوة دوبل الصبح 
قهوة اول لما ارجع عشان مانمش 
واعرف انام بليل وكالعاده مابعرفش
وقهوة ف سط الشغل و الدربكه عشان التركيز
عن الارق والاحلام الملخبطه اللي بتخليك تقوم متوتر
مهما حولت تصفي ذهنك
مهما تخيلت انك هادي 
الارق مابيعتقش
عن الصحه اللي ف النازل الصداع والقولون العصبي
اللي بيهلكوني و يهدوني 

ومش بعيد يموتوني
عن الحته الناقصه اللي بتخللي الحاجات باهته اكتر ما هي باهته 
وبتخلي الحياة بائسه مهما حولنا نلونها
ديما في حته ناقصه عامله ازمه
عن الايام المتكرره اصحي اروح الكليه ارجع اشتغل..الخ
الويك اند اعمل نفسي مش واخده باللي وبرده اشتغل
عن الوجع اللي بقي شئ اساسي مستمر بيكبر ويتكاثر وينتشر 
وانا بطلت ازقه,,سيباه يعشش براحته
عن ام كلثوم اللي بتغنيلي لوحدي في محاوله لتتخفيف عني والطبطبه عليا
شكرا يا ست انا ممتنه 
عن كورس الرسم بالخط العربي وقعت ف حب الناس و المكان 
في حب الخط الديواني اللي بيطلع مزيكا مع كل حرف
ومش قادره اصدق ان خلاص الكورس هيخلص بعد لما اتعلقت به كده
وده حاليا مزعلني جدا
عن الادعيه المتكرره يارب يارب ابعتلي اشاره, رسالة سماوية
قولي اعمل ايه وانا هعمله اوعدك يارب
يارب انا اسفه مش هسيب ايدك تاني ممكن تسامحني المره دي كمان
يارب ابعدني بعيد عن هنا ارجوك
صلحني يارب و طبطب عليا
يارب اجبر بخاطر صحباتي اللي قلوبهم مكسوره و طبطب عليهم
يارب خليك حنين علي يحيي وخليه مبسوط ومرتاح
عن الولا حاجه  كايجابه لاي سؤال من امثال مالك ,سرحانه ف ايه ..
و كاحساس ساعات بيخيم عليا بيبنجني كنتيجه للوجع المتكرر
و كتكرار,,ولا اي حاجه جديده
عن الحياه  اللي مابقتش ملونه ,,ولا حتي بلون غامق
هي كده مابقتش ملونه بقت ..عادي
عن فقرات ضهري اللي بتوجعني م الحنين 
وشيل حاجات كتير وانا راحه الكليه كل يوم
و القعده الغلط وقت الشغل
ومن نوبات الفزع اللي بتهجم عليا فجأه
فانزل كل الهدوم واقعد ف الدولاب اعيط
عن نوبات الفزع لما كنت معاك اخر مره 
خفت..اوي
وكنت بعيط بس انت ماخدش بالك
كنت عايزة اروح..كنت عايزة ماما
كنت خايفه
بس انت ما اخدتش بالك
عن العياط ونضم لاسباب العياط الكتيرة اوي اسباب جديده
العياط من التعب..العياط عشان من عايزة اروح الكليه
والعياط عشان خطوطي مهزوزة عشان ايديا بتترعش
واغيرا العياط عشان مش لاقيه تاكسي وعايزة اروح

عن احساسي بالذنب و التقصير معايا مش مركزه معايا و بحاول اتجنبني
واكتم صوتي الجواني خالص
بحجت انه مش وقته
ورايا حاجات كتير اهم مني

عن هشووو اللي بقيت بقولها اوتوماتك كل لما حد يطول ف الكلام
مش قادره اسمع حاجه ومش عايزة اتكلم معنديش طاقة كافيه للكلام
عن الكذب  اللي بتشوفه ف العيون و بتكذب عنيك
عن التعب ومقاوحت التعب اللي بتتعبك اكتر
عن الشتا اللي مش عايزاه يجي و بقاومه واحاول ابعده
ف البس خفيف واقف ف الشباك وشعري مابلول بعد الفجر
وافضل اقول انا مش بردانا انا مش هعيا 
انا مابحبش الشتا خلاص مابقتش احبه وانا مش معاك
عن الاشباح كاشباح سكناك وانت مبدات تتعايش معاها
بعد هدنه متعرفش حصلت امتي
بس مريحاك
وكاحساسك انك شبح ,,احساسك انك مش موجود
ومش عارف ازاي تكون موجود ومتواجد
ف تعيط في الشارع برحتك لاعتقادك انك غير مرئي
ماحدش واخد بالله منك,,وماحدش هياخد باله منك ويطمنك
عن متلازمه "لا القرب مرتاحله ولا البعاد اقدر عليه"
وما تسببه من خلل في كل من مخك وقلبك
وتشتتك وتتعبك وتهدك و تهبدك جامد
عن حبك
حبك اللي بقي متعب..اووي..
عن كم التناقض اللي يخض اللي بقي جوايا
وكما قالت فيروز:" وانت اللي بكرهه واللي بحبه انت"
وكما قالت الست:"انت النعيم والهنا و انت العذاب و الضنا"
دي حتي إليسا كمان قالت:"من حبي فيك خلاص قربت اكرهك"
حبك ببساطه  بيفرحني وبيتعبني ويبسطني 
ويعيطني ويريحني ويشقلبني ويهبدني ع الارض ويطلعني ع السحاب ويسحب السحابه من تحت رجلي ف اقع زرع بصل وبعدين يمد ايده يطلعني ف اغرق اكتر ورجلي تغرز ويرقصني وشوقتني ويأرقني وشرح قلبي ويوجعه ف نفس ذات اللحظة
لك ان تتخيل بقي ..!

09 November 2013

ع الغارب

يارب ساعدني ,,ومتسيبش ايدي ابدا فغرق ..
العنوان من قصيده لمصطفي ابراهيم

08 November 2013


حملْنا الصناديقَ
ومشينا نَحْلُمُ
بخشبِ التوابيتِ يخضرُّ
.يعودُ أشجارًا نتسلَّقُها

 سوزان عليوان
ازاي قادر تجمع بين احلي حاجه حصلتلي واكتر حاجه وجعتني ف حياتي
ازاي انا معاك بقيت متناقده كده
بتمني اني اكرهك مع اني بحبك ومتمسكه بحبك جدا
بهرب منك وبستناك تلاقيني
مابتوقعش ومبستناش حاجه منك عشان متخذلنيش وديما بتلاقي طريقة وتخذلني
الحلاقات المفرغه,,وتكرار الحكاية الخايبه بنفس تفاصيلها
عن الوجع اللي عشش ف قلبي وجسمي
والدموع اللي بتققع من عيوني عمال علي بطال لاتفه الاسباب واقلها
عايزة ابقي وحدي ..وعايزاك معايا
حبك مرهق ,,بنفس حجم ارهتاق الخذلان

24 October 2013

-يالهووي يا هند خضتيني جامد اووي افتكرتك يحيي ,,بليز بليييز غيري صورته
_انا اسفه انا والله ماقصدش ..انا بس كنت عايزة اطمن  عليكي ,,هتعملي العمليه امتي ..؟

***
كل صحابي من غير ما يتفقوا غيروا صور يحيي طول الوقتت كنا بنخض بعض ,,بس انا قررت قرار غير معلن اني مش هتكلم مع حد منهم وهسيب الصوره..!

21 October 2013

انساني ياوجع


نسيت ازاي الواحد كان بيكتب فيطلع كل الشحنات السلبية والوجع والغضب عشان يعرف يخزن تاني
نسيت ..زي ما نسيت يعني ايه فضفضه
ولان معنديش اي وسيله للتفريغ ف ببساطه باكل ف نفسي
الحاجات جوايا عماله تتراكم وتكتر وتكبر وانا مش عارفه اشيل الحمل لوحدي ورافضه اي مساعده و بترنح ..وبكابر
وبعد فنره مبالغ فيها من اصطناع الهدوء والكتمان يعترض قولوني العصبي ويثور عليا جامد كنوع من انواع الضغط عشان ادور علي اي مخرج او اطلب مساعده
فانفجر ف نوبه عياط بشحتفه و تنطيط من الوجع و الغيظ
واقضي الليل قاعده جوه الدولاب بعد ما نزلت كل الهدوم في الارض بدندن "روح ياوجع عنه روح للدبه نانو,,دي كبيره وتستحمل عنه" -يعني علي غرار روح يا برد عنه...- في محاوله لايجاد مكان امان اقدر اهرب في من نفسي واعيط زي الاطفال من غير مالومني او اطلب مني ابقي قوية ..
"ياريتك بتبوسلي الوجع تايهدي وينام"

08 October 2013

اكتوبر ..وجع


“إن بعض خسائرنا ترتبط تلقائيا في أعماقنا بالموسم او بالشهر الذي خسرناها فيه..بالتالي يصبح هذا الموسم/الشهر..موسم تأبين بالنسبة لنا في كل عام..لأن ذكرياتنا تئن من خلاله في لاوعينا..وبالتالي تمر أيام الذكرى بحرارة وحزن ولا نفهم اسبابها..” 
أثير عبدالله النشمي-في ديسمبر تنتهي كل الأحلام

05 October 2013

ماتجيش يا شتا

Summer disappears like a dream I had
And winter comes with a knife that cuts you down 
And it never ends..

The Pierces - It Will Not Be Forgotten

رساله الي السماء


عزيزي يحيي

تحيه طيبه و بعد ..احب اقولك انك وحشتني بغباء ..واني قررت اكتبلك رساله احكيلك فيها شوية حاجات انت اكيد مش هتبقي مهتم تعرفها ..بس ما علينا اولا لازم تعرف اني مش فاكره الرسايل كانت بتتكتب ازاي ..بس هحاول..
ثانيا غير انك واحشتني و اني مفتقداك انا بقيت بخاف عشان يا الناس مش بتديني  وقتي اشبع منهم او انا اللي مش بطالب بوقتي ..المهم ان ناس كتير اوي وحشاني ومش بشوف حد ..بس زي ما انت عارف احنا خلاص كنا هنتقابل يللا تتعوض..
اه كنت بقولك اني بخاف ..بخاف الناس تعمل زيك ويقرروا يمشو من غير ما يقلولي سلام..انا مش زعلانه منك بس كان نفسي تستني يومين اشوفك ولو حابب بعدها امشي .. ومش بلومك انت بس واحشني
عارف.. البنوته العسوله اللي اكبر مننا بسنه اللي انت خلتني اتكلم معاها واتعرف عليها وانت مش واخد بالك سالت عليا من فتره بس انا مردتش عليها ..عشان لقيتك واقف بيني و بينها و ده كان كفيل انه يتوه الكلام مني و ينيمني معيطه ..
قالتلي انها بتتمني اني اكون لسه برسم فراشات ..
عمتا انا مش عارفه اتكلم معاها عشان اول صوره بتيجي ف باللي انا وهي واقفين في وسط قاعه مليانه ناس كتير لبسين اسود واحنا حضنين بعض و بنعيط و بنطبطب علي بعض بتوتر ..شفت ازاي عندي حق ..بس ماتقلقش انا عارفه انها مش هتزعل حاسه انها بيحصلها كده بردو..
انهارده اتكلمت عليك كتير قولتلهم انت احسن حد حصل وانك كنت نقي اووي وكنت بتدافع عننا واحنا في المدرسه لما حد تحصله مشكله ..بس ماقولتلهمش قد ايه انت واحشني
اه وقلتلهم كمان ان يمكن لو كنت متعوده اشوفك كل يوم يمكن كنت اقتنعت انك مشيت ..
الكتابين اللي جبتهملي هديه في عيد ميلاد صاحبتنا بدون مناسبه حطاهم تحت مخدتي بس مش قادره اقراهم انا عارفه انك جايبهملي من زمان بس دخلو في وسط الورق و الكتب ولسه لقياهم من كام يوم..
عارف لقيت ايه كمان ورقه مقطوعه من كراسه مكتوب عليها بالرصاص "ماتعيطيش" ..!
صحابنا وحشوني اووي هما كمان بس زي ماتقول كده خايفين نتقابل و بنهرب من بعض ..
انا مش عارفه ايه الهدف من الرساله ..وعارفه انك ممكن تكون مشغول شويه ومش فاضي تبص علينا ..كان نفسي اقولك ماتقلقش احنا هنبقي كويسين ..بس ماينفعش مش هاعرف..اكدب عليك يعني ؟!
ليك صوره انت واقف و وراك نجوم فضي بتلمع متعلقه في كل حته و في واحده منهم انت حطتها في جيبك ..انا كل يوم بفضل بصه للصورة دي لحد ما انام ..ديما بتخيلك كده في مكان كله نجوم بتلمع وممكن نحط مع النجوم شوية فراشات بتلمع كمان..فاكر لما كنت ديما تقولي" انتي فراشة بمبي قاعده جمبي "..
انا بحاول ماعيطش اهو زي ما انت كتبلي ع الورقه واسمع الكلام ..بحاول والله بس مش عارفه ..
انا هروح انام عشان مازعلكش اكتر من كده..

يللا تصبح علي ملايكه
صاحبتك المخلصه

04 October 2013

انا كويسه

و تكرار "انا كويسه" في نفس الجمله ميت مره اكيد اكيد بيثبت قد ايه انا مش كويسه
انا مش بكدب عليا ولا اعلي من روحي المعنوية ..انا بس عارفه كويس ان الايام اللي جايه انا هبقي مش كويسه اكتر واكتر
|ف انا كويسه حاليا و نسبيا عما سيحدث..

03 October 2013

هروب بوجع


في الحقيقه كل ما افكر اقعد اكتب اتواطئ معايا واهرب ..
حياتي مكمله ..وماشية بسرعه كمان.. بس من غيري..
بهرب من كل الناس ..و بضحك بصوت عالي ضحكه مهزوزه علي حاجات تافهه..
بيفاجئني العياط في اوقات غريبة ولان العياط رفاهيه ..بعيط بكل ما اتيت منها
معنديش طاقة للكلام ..ومش عارفه افتكر يعني ايه فضفضه
وعشان الموبايل يستحقه اللي يقدر يقفله *..ف انا قافله موبايلي من مش فاكره قد ايه و مش عارفه لامتي
عماله اكتب و امسح كتير ..عشان انا عارفه ان كل الكلام ده بخبي به كلام تاني واجعني مش راضي يطلع..

الاكتشاف الاول اللي مابحاولش انكره "الوجع بيغير ..بيغير اووي"..
والاكتشاف التاني "تكرار الوجع لا مش بيهونه"
و ف الحقيقه انا موجوعه اوي ..ومش عارفه اكتب ..
"ليتنا نتقن نسيانهم كما نتقن النسيان لهم .."*



*عمر طاهر
*من كتاب لا شئ يشبهني

30 September 2013

عن الوقوف ف النص بين كل حاجه وعكسها 

25 September 2013

عتمه..


عصافير ايلول سرقت من دموعي النوم و الالوان ..

سوزان عليوان

24 September 2013

علي مهل ..اتخلص من كوني انا
واتمثل في اشياء اخري تشبهني ..

27 August 2013

عك


وكاعتراف ليلي ..هنكره الصبح واكابر..
انا مش كويسه  خالص ..

عشان كده بعت لرضوي مسج اقولها خدي بالك من نفسك..
عشان في الحقيقة انا مش عارفه اخد باللي مني نهائي
محتاجة اكتب ..بس مش عارفه
دماغي زحمة وكركبه
ورغم كده حاسه اني مهجوره من جوا
والحزين اني مافييش نفس للمناهده والطبطبه عليا
مش عارفه اتكلم مع ربنا..فبطول في السجود واسكت !
عندي قابليه للعزله في ازدياد مرعب..
و الخذلان مرهق..مرهق اووي
ومش عارفه ازاي اعراض الانسحاب ممكن تيجي بعد خمس شهور
وكاني كنت محتاجه خمس شهور عشان بس استوعب !
دموع لا ارادية ..
ورغم كده في عياط مكتوم ..كتير اووي وجامد
حاسه بكدمات زرقا في قلبي
وحاسه كمان ان انا وحشاني
حاسه اني تايهه..وتعبانه
ومستسلمه لكل ما هو سيئ..
فهروح انام عشان انهي اليوم
واخد استراحه من الوجع والانفلونزا
تصبحوا علي ..معرفش بقي ..
انا مش كويسه  خالص ..
عشان كده بعت لرضوي مسج اقولها خدي بالك من نفسك..
عشان في الحقيقة انا مش عارفه اخد باللي مني
محتاجة اكتب ..مش عارفه
دماغي مكركبة
والحياة ماشيه غلط..
وانا واقفه مكاني
بعد لما فضلت امثل علي نفسي اني مستسلمه لمده خمس شهور
بعد لما كنت خلاص متخيله اني بقيت عادي
فجأه لقتني اتهديت وقعت..

13 August 2013

يا وجع ما عم بيروح


اكتشفت اني مهما حولت اجري واستخبي جوايا 
اعمل نفسي مش واخده باللي 
ادي ضهري للدنيا 
مهما عملت الكلام المتخزن واللي لسه بيتخزن بيترسب و يعمل تقل
كلام كتير مش قادرة اطلعه ..وبحاول كل يوم قبل ما انام استعيد تفاصيله خوفا من النسيان
خزين كلام كبير عملاق بيخليني افضل صاحية باليومين مش عارفه انام 
وهو نفسه خزين الكلام لما بنام بيخليني مش عايزة اصحي ..
معنديش طاقة للكلام ولا رغبة في الرغي
عندي حاله من الانانية الغريبة او الغيرة علي حواديت قديمه و قصص واحداث هبلة
مش غرقانة جوايا ..ومش مندمجه في اي عالم
بحاول احاذي كل حاجه وانا مش عارفه فعلا هل في كلمة اسمها "احاذي" ولا لا
عايزة انام عشان زعلانه ومش عارفه انام عشاان بطني وجعاني من الزعل
حلقات مفرغة ماشيه فيها بملل

اتفرج علي لوحات بالوان ساخنه متداخله امبسط
اقرر اني هرسم زيها بس علي شبهي اكتر ..بس مش انهارده ..في يوم من الايام اكيد
سلمت شغل بشتغل فيه بقالي شهرين حاسه براحه اكتر ما انا سعيدة وده شئ حزين
الشغل اتسلم بس ما تسلمش معاه التوتر ..
حاسه اني محتاجه اطبع صور لينا زمان و دلوقتي و اعلقهم جمب سريري 
حاسه اني عايزة ابني جدار عازل في نص اوضتي عشان تبقي اصغر يمكن احس انها بتاعتي اكتر ..
سمعاتي ضاعت وضاعت معاها الموسيقي و الاحساس..

لما حد يحاول بكل اصراره انه يقتحم عزلتي و يحاول يبسطني
عارف  شئ حزين اوي حزين جدا اني المفروض ابقي سعيدة دلوقتي وانا ببساطة حزينة بشده..

سرحت وانا بحط الاطباق في الغساله علي غير العادة طبعا
"هل يا تري السمك في البحر اكتر واللي االنجوم في السما عشان احبك اكتر منهم ؟!"..
و بعدين ركزت اني مش محتاجه اوصفلك الحب ده قد ايه كبير جوايا عشان انت بكل بساطه مشيت..

يارب ..يارب ابعدني بعيد ..
انا بحب الناس اللي بتسيبني ابعد و اخد راحتي و اغيب ولما ارجع ما يلومنيش ما يسألونيش كنت فين ويستقبلوني بحضن كبير وبس

كنت اعرف ناس زمن كده ..بس اتغيروا

مش قادرة نفسيا احط منيكير احمر ..
في كل يوم باجي اخرج فيه بلبس الفستان الفراشات الملون وبعدين ابص لنفسي في المرايا احس ان شكلي علي قد ما هو مبهج علي قد ما انا حزينة ..بقرر ابقي صادقة مع نفسي اروح اغير والبس فستان الزعل و انزل ..
ماحدش ابدا عارف ان ده فستان الزعل بس انا بستريح لما البسه عشان انا عارفه..
وعملت منه كمان نسخة بيتي ..

من كام يوم نزلت عند تيتا عشان ازورها بعد ما وقعت وايديها اتكسرت كتبتلها ع الجبس
هي كنت مستغربة الفكرة جدا
وبعدين انا حسيت ان منطقي جدا انها تستغرب وان ده استهانه واستهتار بالوجع
يعني يا هند تحبي حد يكتبلك علي قلبك اللي وجعك للذكري؟!

13 اغسطس كفاية اوي لحد كده ..ارحل بقي
هو ما ينفعش يوم كده انام خاطري مش مكسور ؟
يا خاطر مكسور مين يجبره ؟..يا الله

انا عيانه اووي
عندي انعدام شهية مزمن للحياة ..
ممكن يتاخدله ادوية كتير اووي تختارهم علي شرط ان ميكنش في لون منهم متكرر وتبلعهم كلهم سوا
وتنهي حياتك بجرعه ملونه مكثفة ..اوممكن كمان تشرب مايت الالوان مثلا ..اسهل

ممكن وجع اقل؟..ممكن ؟
طيب طاقة كافية لكل الوجع ده ؟

يخربيت الوجع والموت والاشتياق
يخربيت ميت الف مره الكلام المتخزن والبعاد واللي بيتعاد..
نأسف ع العك بوست اتكتب بين النوم والصحيان او الصحيان والنوم مجرد بس محاوله للتفريغ ..

11 August 2013

وكم من الاعياد مر من دونك


والعيد عم يخلص وانا بهالعيد وحدي يا حبيبي وانت بعيد ..*

العنوان لجاهده واهبه
*اغنية لماجده الرومي

06 August 2013

نطرتك ع بابي وع كل البواب


واكبر غلطه ممكن تعملها في حياتك انك تستني حد مطلبش منك تستناه ..
بس انت بتستناه و بتغلط اكبر غلطه في حياتك للمره
 الديشليون..

ودعوتي وسط الصلي :"يارب ..يارب خليني احب الناس قد ما بيحبوني ..يارب ولا زياده ولا اقل ...
يارب خليني اشوف الناس صح زي ما هما ..يارب خلي الناس تشوفني صح من جوا
يارب جبر الخواطر عليك اجبرلي خاطري ..ممكن ؟"
عياط علي كسرة الروح و النفس
علي تفاصيل هابله كتير كانت بتلمع في يوم وافتكرتها مميزة ..
طلعت عادي
طلعت ولا حاجه ..
عن رقصه اتوعدنا اننا هنرقصها سوا..
اتفقنا ع المكان وع الزمان
علي نوع الرقصه و اللبس
 ماتفقناش علي اغنية مش عايزين اغنية عايزين موسيقي..
وتفاصيل ..تفاصيل كتير اوي اتفاقنا عليها
لدرجه اني رسمتهالك لوحه ومكتوب ع الجمب مزيد من التفاصيل..

رقصه ملحقناش نرقصه ..
بس انت رقصتها و بتقولها تسمحيلي بتاني رقصه ؟!
.

31 July 2013

حضن مش متكروت


محدش عنده صبر يخدك في حضنه لغاية لما تحس انك في امان ..فتعيط
محدش عنده صبر ..
وانا ..انا معنديش حد حتي معندوش صبر ..!
واحضنوا الحاجة بضمير (يرحمكم الله ) -مصطفي ابراهيم

29 July 2013

لان الصباح فقد لهفته
لاني فقدت شغفي
لان الاشياء فقدت بهجتها
الالوان باهته
الحزن طاغيا
والوجع فوق الوصف والاحتمال
لان الحبيب غائبا
فقدت الحياة معناها..

26 July 2013

وفينك..؟


عارف انا بس عايزة ايه ؟
عايزة احس ان في حد موجود ..مش مهم اتكلم معاه..مش مهم اعيط علي كتفه ..
مش مهم يطبطب عليا ينيمني..مش مهم يكون موجود قدامي حتي..
فاهمني ؟؟
المهم يكون موجود عشاني حتي لو مش موجود..حد يسندني حتي لو مش بقع..!

بس عارف انا دلوقتي بقع ..ومفيش حد ..
عارف كمان كان نفسي تبقي انت الحد اللي مش موجود بس رغم كده موجود ..
بس انت ..انت بس مش موجود ..!

25 July 2013


“I didn’t plan on falling in love with you, and I doubt if you planned on falling in love with me. But once we met, it was clear that neither of us could control what was happening to us. We fell in love, despite our differences, and once we did, something rare and beautiful was created. For me, love like that has happened only once and that’s why every minute we spent together has been seared in my memory. I’ll never forget a single moment of it.” -The Notebook

عن/الي يحيي

ازيك يا يحيي ؟
عامل ايه عندك يارب تكون مبسوط و تكون كمان مرتاح ..
وحشتني و عايزة ابقي اشوفك قريب بقي..
وصلتلك العمره ؟ كان نفسي انا اللي اعملهالك الاول
عارف انا وعدت فاطمة اني مش هعيط تاني ..بس بعيط تاني كتير..
عبد الرحمن كلمني كذا مره بس انا مردتش ..مش عندي طاقة للكلام ..الكلام بقي مرهق اوي
بعتلي رسالة قاللي انه عنه مشكلة وعايز رأيي ..عارف قاللي ايه بعدها ..قاللي انه بيحترم رأيي جدا و بيثق فيا زيك كده
ف فهمت انه عايز يحكيلك انت ..
حكاللي عن الاحسان اللي بيترد عليه بظلم بدون سبب
وقاللي مش ربنا قال هل جزاء الاحسان اللي الاحسان " ازاي ه يحصل
اتكلمت معاه كتير ..بس فضلت الاياه في دماغي بتزن كذا يوم "هل جزاء الاحسان اللي الاحسان "
بس ربنا ماقلش ان الجزاء ده من الناس ..
عمر كمان بعتلي يطمن عليا ..ومن بين كلام كتير اوي قال انه بيشوف فيا كتير منك ..
انا خفت ساعتها ..بس عارف امبسط انهارده لما لاقتني عارفه كويس اوي كان ايه هيبقي رأيك في كل اللي بيحصل ده..

20 July 2013

فَصَبْرٌ جَمِيلٌ


الحمد لله ..الحمد لله حتي يبلغ الوجع منتهاه ,,وعندها ستتحرر الروح وتخرج الفراشات,,ونولد من جديد..

الحمد لله علي كل حال..
الحمد لله..

19 July 2013

لا مزيد من البوح عزيزي


كل يوم بفقد اسباب شغفي للحياة اكتر..
في محاوله مع صديق لتذكر كيف كان البوح
ابدا في الحكي بحاجات عادية..الروتين المستمر حتي في وقت الفراغ
احاول ان اقترب من الوجع
اقوله :"ان بعد لما يحيي مشي بقي الوجع فوق الاحتمال.."
يقوللي:" اولا يحيي ربنا يرحمه..ديما قوليها كده
واسمها يحيي توفي ..صعبه انا عارف يا هند ..بس لازم تتقال كده دي الحقيقه.".
استأذنه..واروح الحمام افضي مخزون العياط اللي عندي عشان اعرف اخزن تاني..
وبعد فشل المحاوله عاهدت نفسي ان لا ابوح لا اي حد باي شئ ..

لان ببساطه اللي هيحس وجعك هيطبطب عليك من غير ما يهتم يعرف السبب..
يارب ماتبعتليش حد ياخد باله مني..خد بالك مني انت يارب
يارب ماتبعتليش حد يطبطب عليا..طبطب انت عليا يارب
يارب خليك حنين عليا وعلي يحيي ..

18 July 2013

يللا يا ثورة هبله


انا ممكن افهم موقف الفلول و بتوع اسفين يا ريس واللي كانوا بيموتوا في حسني مبارك و من بعده كانوا لحسين بيادات للمجلس العسكري..منطقي
ممكن افهم موقف بتوع الاستقرار وعجلة الانتاج بتوع اهم حاجه انا عايش كويس معايا بنزيني وتمويني وعيالي جمبي واللي بيتنحوا للاعلام واهم حاجه عندهم الدنيا تمشي ..تمشي صح تمشي غلط مش مهم المهم تمشي وناكل ونشرب و ننام
دول كلهم انا فاهمه موقفهم 
اما بقي اللي فعلا مش قدرة افهم موقفهم هم الثوار اللي اتنبح صوتهم سنه ونص يسقط حكم العسكر ..اللي اتقتل صحابهم قدامهم علي ايدين الجيش و الشرطه ..ودلوقتي بيمشوا في مسيرات تهتف الجيش والشرطة و الشعب ايد واحده وهتافات مشابهه
نسيتوا اعتصام مجلس الوزرا كان ايه مطالبه ؟؟!
انا مقهوره حاسه ان اننا بعنا دم الناس رخيص اوي ..مجلس عسكري تاني ..جنزوري تاني ..وزرا كلهم فلول تاني !! عاي كده ؟!!
طيب ما كان من الاول قبل ما يبقي فيها دم كنا رضينا بشفيق رئيس وزرا و الجنزوري من بعده ايه الفكره ايه الفكره مدام كده كده هتسكتوا و تهللوا للمجلس العسكري اللي بيحمي الثورة تاني اهو ..!

لما تبقي الوزارة كلها سوابق
لما يبقي وزير الطيران تصالح مع جهاز الكسب غير المشروع و دفع 4 مليون جنيه علشان ميدخلش السجن 
وزير الكهربا هو نفسه اللي كان موجود في حكومة هشام قنديل يابتوع النور بيقطع و الجو حر !!..لما يطلع يقول المواطنون فاجأونا
بالترشيد خلال رمضان المفروض اصدق عادي يعني؟!!
وزير الزراعة كان يوسف والي هو اللي معينه رئيس مركز البحوث الزراعية واحمد شفيق جابه وزير زراعة في حكومته 
وزير التنمية المحلية كان ظابط امن دولة و كان أحد رجال مبارك المخلصين و كان كل ما مبارك يشيله من حتة يحطه في التانية واكتشفوا في مكان شغله مقابر لمجهولين !
مستشار ( جمال مبارك ) السابق، " أحمد جمال" وزيرًا للمالية...
 وزيرالداخلية هو نفسه اللي كان في حكومة هشام قنديل(بتاع الانفلات الامني) وهونفسه اللي 6 ابريل اتظاهروا عند بيته بالملابس الداخلية
وزير الإسكان و وزيرة الاعلام و وزير المالية كانوا من مشاهير الحزب الوطني

مظاهرات يومين سموها ثورة وقامت عشان الكهربا بتقطع ومفيش بنزين وبعد ما زي ما بتقولوا نجحت سابت وزير الكهربا ووزير الطاقة في مكانهم..!!
  • الثائر الأهبل هو اللذي يثور ليهدم الفساد .. ثم يثور كمان مرة ليعيد نفس الفساد*

    لتكونوا صدقتوا انكم هتنزلوا معاهم يوم 30 و مش هتهتفوا ضد الفلول ولا العسكر ولا الداخلية، 
    وبعد مانخلص م الإخوان، هنخلص عليهم، ونعمل قانون عزل سياسي ومحاكمات ثورية و مجلس رئاسي..لتكونوا صدقتوا بجد ؟!! 

    عزيزي #الثائر_الكوبري اللي متضايق من التشكيل الفلولي الوزاري الجديد دوركم كان إضفاء غطاء ثوري وعملتوه خلاص شكرًا ولا عزاء للمغفلين ..!!*
والله حرام دم الناس الي ماتت ع الفاضي دي والله حرام !!..حسبي الله ونعم الوكيل 


*سمية الطاهر
*محمد ممدوح 

16 July 2013

تناتيف الحب اللي باقي


وبقيت الحب اللي فاضل بعد اللي بنحبهم ما مشيوا مستخسرينه في الزباله ومهما نبقشش به ع الغلابه مابيقلش..فتلفه كادو وتديه لواحد عنده جفاء عاطفي وتقشف في مشاعره ..وتروح بليل طمعان في نوم كتير كتير اوي تفصل به الايام اللي شبة بعضها بايام تانيه شبه الاولنيه ..تنام نصايه وتصحي علي قلبك واجعك وناس وحشاك ونوم هربان من عيونك التعبانه ..فتبكي كتير علي امل ان البكي يزيح الوجع فتصدع.. وتكتشف كل مره كأنك بتكتشف لاول مره ان "جدا" دي طلعت كبيره اوي لا تعد ولا تحصي ..فتحاول تحسب قولت كام "بحبك جدا" وازاي كل مره كانت "جدا جدا" وبقوة ..
فتحاول تعرف حجم الحب اللي فاضل بعد اللي بنحبهم ما مشيوا فتضرب رقم فتقدره يعني مثلا يجي كده ويمكن اكتر قد حبك للحياة ..!

15 July 2013

البوح مرهق يا عزيزي


-هند بصي في عيني ..قوللي كل اللي جواكي ..طلعي كل الكلام المتخزن عشان ..عشان 
-عشان ما يكمكمش
- ايواا عشان  ما يكمكمش ..
و فيبصلي في عيوني كتير
فحس انه بيخترقني ..بيخترق افكاري
فابتسم بتوتر و ابعد وشي
ما بترضاش تسيب عنيا تهرب من عنيك ابدا
-ها انا مستني
احاول اقنعك اني حكتلك ملخص الكام شهر اللي فاته
من ساعه ما اخدت الاجازة و انا هاريه نفسي شغل
وكل ما اخلص حاجه افتح علي نفسي فاتحه جديده..
 لوح الزيت العملاقه اللي ببتدي فيها ..وغلاف المجله اللي بصممه..
و البازل الكاب كيك اللي جبته و اشكال الساعات اللي بصممها..
و وريتلك صور الحاجات اللي خلصت ..
بس من بعد ما يحيي مشي و انا مابقمش من السرير مش عايزة اكلم حد اكتر من الاول
بعيط طول الوقت جامد ومن غير ما اعوز اعيط الدموع بتقع من عيوني سخنه و كتير
كل لما اجي انام بصحي مخضوضه جامد
فامش بنام ومش باكل ومش بكلم حد
بزعق لاي حد بيحاول يخترق المساحه بتاعتي واي حد بيحاول يطمن عليا ..
و اتنهدت و سكت..
-قاللي انا عارف كل ده انا عايز الكلام المستخبي
هند انا شايف في عنيكي اسئله كتير
-اسئله ؟! شايف ايه قولي
-ما تهربيش انا اللي بسال
ابتسم بوجع -عارف لما يبقي في دوشة كتير اوي في حياتك و فجاه كل حاجه تسكت ..فتحس قد ايه انت لوحدك
انا كنت بتكلم عليه
بس هو افتكر اني بتكلم علي دوشة الامتحانات والتسليمات و كده
سكت و سيبته يفهمني غلط
-حولت اوصلك كتير ..كلمتك كذا مره
-ماكنتش برد علي حد اي حد
وكملت في سري ماكنتش برد علي حد غيرك لحد ما لقيتك اخترت كان لازم احترم اختيارك وابعد واوفر عليك مقدمات سخيفه و احساس بالذمب نحيتي اوفر عليك كتير  احترمها حتي لو هي في نظري ما تستهلش ده نهائي..
-عارفه عمري ما كنت هكلمك اطلب منك اني اشوفك تاني
-ليه عشان مردتش عليك ؟
قاللي وهو باصص في عيني جامد -ايه ده لا طبعا هند انا محرج منك مليش وش
قطعته و قلتله ببساطه وبحب انا مش زعلانه منك
و كملت في سري اصل ما ينفعش حد يزعل من حد بيحبه ..عارف اصل الحب والزعل بيتعارضوا ..انا بس موجوعه من اللي حصل
حاست ان مسامحتي له ببساطه محسساه بالذنب اكتر ومخلياه يصر ع البعد اكتر
-بصلي كانه بيطبطب عليا بعنيه ..-لازم تخرجي اللي جواكي
ابتسم بوجع و طيف دموع بيخيم علي عنيا -انا نسيت ..انا نسيت ازاي الواحد كان بيفضفض
و اكمل في سري اني ديما بحكيله وبفضل اتكلم معاه طول الوقت طول اليوم وبالذات قبل ما انام ..انا بس نسيت ازاي الواحد بيفضفض بصوت عالي..
يقطع قطعه تانية صغيرة من الكاب كيك و ياكلهالي
اقوله اني مش جعانه
يرد وهو يعني الكاب كيك ده يعتبر اكل
كنت حاسه بدفا لاففنا احنا الاتنين بس دونا عن كل الناس اللي في المكان
و سرحنا في عيون بعض زي زمان مخلينا مانسمعش ولا نحس باي حد حولينا
عارفه انه كان عايز يتكلم في اللي حصل وانا كمان بس معنديش اي طاقة
كنت كل شوية بغير الموضوع ..بس كنا بنلف ونرجع تاني لنفس النقطه
اتكلمت معاك كتير و سالتك علي حاجات كتير ولومتك وعاتبتك وحاكتلك وفضفضتلك وانا باصه في عنيك
عارفه انت كنت شايف ايه وعارفه انك بتعرف تقرا عنيا اكتر ما تفهم كلامي 
وعارفه ان وصلك كتير من ثرثرت عنيا وانك بس كان نفسك احكيلك علشان تتاكد..
اعترف اني اتحسنت بعد لما شفتك شوية..بس كان نفسي تعمل زي ما قولت عشان ماحسش اني ندمانه اني شوفتك بس انت معاملتش ومعتذرتش ..وانا ماندمتش !!
فكرت ابعتلك اسألك علي حاجات محيراني و حاجات مش فهماها ..بس خفت بدون سبب قولت استني للصبح ..والصبح استخسرت فيك السؤال ..لاني وببساطه لسه بلومك علي غلطات غبيه بسببها احنا بعاد عن بعض دلوقتي..
كان نفسي احكيلك عن يحيي اكتر و قد ايه هو شخص جميل..وقد ايه انا اتوجعت لما مشي فجأه..
بس حسيت معرفش ليه كأن يحيي ده سر وانا عايزة احتفظ به لنفسي ..فسكت
رجعت باسأله اكتر وكلام اكتر متخزن وزن اكتر بيني وبين نفسي عشان نفسي اشوفك تاني اشوفك وقت اطول..
و السؤال الاكتر اللي بيلح عليا دلوقتي
هو الواحد ما ينفعش يبقي مرتاح و مبسوط في نفس الوقت ؟
هو فعلا ما ينفعش الاتنين مع بعض..؟

يا رب ابعتلي حد يعرف يطبطب عليا و الطبطبه توصل قلبي ..
او يارب طبطب انت عليا طبطبه توصل لاعماق قلبي
يارب خليك حنين عليا وعلي يحيي
يارب خليه مبسوط ومرتاح عندك يارب..الاتنين يارب
عن يوم 9-7 و رساله الاستغاثة و مابعدها..

اليوم كله يتلخص في "i look at you and..and i'm home "

مش كل الوجع علاجه الكتابه يارضوي
في وجع بيهبد الواحد جامد اووي بيخليه حتي عاجز مش بس عن الكلام لا ده حتي الكتابه كمان!..

09 July 2013

ازاي

لما حد يسألني عليك اقولهم ازاي انك مشيت يا يحيي وانا بسهر اتكلم معاك كل يوم من بعد الفجر لحد الشمس ماتطلع ..!

08 July 2013

انا اسفة يا يحيي

صليت الفجر يا يحيي؟؟
حرما يا صاحبي
انا اسفه يا يحيي معرفتش اروح اوقفه اللي عند دار القضاء
 اللي اتفقنا مع بعض اننا هنروحها سوا
انا اسفه
انا عارفه انك استنيتني هناك
انت عمرك مابتخلف وعدك
انا عارفه انك مش هتزعل مني
اصل العزا كان في نفس معاد الوقفه
قولتلهم هروح و استنوني بس ماسبونيش اجيلك
يا يحيي كده تمشي قبل لما اشوفك
كنت واحشني اوي اصلا
كان كلها يومين ..يومين بس يا يحيي
كنا هنتقابل و نهتف سوا الهتافات اللي بتحبها
اتنين ملهمش امان العسكر و الاخوان
و يسقط كل من خان عسكر داخلية اخوان

رحت العزا يا يحيي ..يارتني ما رحت
اكيد ده ماكنش حقيقي اكيد العزا ده مش بتاعك
قولي اني غلطانه عشان خطري ..


اللهم آنسه في وحدته وآنسه في وحشته وآنسه في غربته ..

يرحم روحك يا يحيي

Fatma El Kordy
بدل مننزل نهتف سوا روحت عزاك ! كده يا يحيي ؟! عارف انا الي زعلني اوي انا قريت كلمة المرحوم مكتوبة عالقاعة ....بس معلش انا عارفة انك في مكان احسن بكتييييير و مبسوط اويييي كمان :') هتوحشني يا يحيي مع السلامة يا صديقي الثائر المثقف الصغير ... الحمد لله الذي لا يحمد علي مكروه سواه ... اللهم أحسن خاتماتنا يا كريم يا الله .. اللهم أنس وحدتة و أمن روعتة و لقنه حجته يا كريم ...

07 July 2013

انت مامتش صح ؟

بقالي 12 ساعه مستنياك ترد عليا..انت هترد عليا صح..يا يحيي بقي رد..ارجووك بقي
شفت النائب العام استقال يا يحيي ..خافوا مننا
لغوا الوقفه انا قعدت اقولهم ازاي تلغوا الوقفه اللي هقابل فيها يحيي..ماينفعش تلغوها
بس محدش عبرني..
 انا قولت لفاطمة اننا لازم نروح عشان انت مش بترد علينا ومتعرفش انها اتلغت
انا واثقه انك هتبقي هناك ..احنا اتفقنا مش كده ؟

تعالي يللا  نسهر نشتم في الشعب سوا..
انت فين ؟ ..اتاخرت ليه عليا انهارده ؟



عارف انت مموتش ليه ؟؟ عشان انت عايش جوانا يا صاحبى انت زرعت جوانا حاجات تخلينا منقدرش ننساك خليتنا نبص فى وشوش بعض نفتكرك الله يرحمك يا صاحبى و يجعل مثواك الجنة

يارب خليك حنين عليه.

06 July 2013

يرحم روحك يا يحيي

يحيي ماات !!
يحيي مات ازاي
ده لسه من كام ساعه كنا بنتفق اننا هنروح مع بعض مسيرة وزارة الدفاع و عند دار القضاء .
كنا لسه بنشتم في الشعب و بنقول عليه عبيد
كان لسه بيقولي رأي باباه في اللي بيحصل
كنت لسه عماله ابعتله في اخبار وحشه
كنت لسه عماله اقلش عليه و هو مافهمش وافتكرني بتكلم جد
خلاص يا يحيي تعالي و اوعدك مش هفضل ابعتلك في اخبار وحشه كل شوية
ومش هغلس عليك تاني خالص..
يعني خلاص كده مش هينفع نسهر لحد البصح انا و انت نتكلم في السياسه و نشتم في الشعب تاني
يا يحيي ولا حتي مره كمان..
مره واحده كمان طيب ؟؟!!!


يحيي صاحبي من 17 سنه اعرفه من اولي حضانه
كان ديما صوت الحق
كان ديما احسن واعقل واحد فينا ..
يحيي مامتش ..يحيي هيفضل عايش فينا ..


يارب ثبته عند السؤال..خليه يا رب يجاوب زي ما كان بيجاوب في المدرسه ..يارب بقي

02 July 2013

الطرف التالت


طبيعي جدا اني لما الاقي صفوت حجازي وعصام العريان وخالد عبدالله و الاخوان في طرف والجبش والشرطة والفلول في طرف .... يبقي انا الطرف التالت
سمية الطاهر

ما تدّخلوش بينّا خاين عشان نكتر*


انا منزلتش في حته ..ولا مشيت في مسيرة ولا رحت ميدان ..ولا شركت في اي احداث لغاية دلوقتي لسبب واحد اني ضد المؤيدين و ضد المعارضين

انا ضد اننا ننزل مع فلول واسفين ياريس وجيش وشرطه(شايله صور شهداء..ياتري كل واحد شايل صورة الشهيد اللي قتله ولا مش ضروري يعني ؟) و بقايا نظام ايديهم ملوثة بالدماء حتي لوعدونا واحد ولما يطردوا الناس من المسيرات عشان بتهتف ضد الداخلية و الجيش تبقي فين الثورة ؟!


ضد اننا ننزل مع الاسلامين بعونا وكانوا بيهتفوا الجيش والشعب ايد واحده والجيش بيقتل فينا وكانوا لحاسين بيادات والتخاذل الرهيب منهم ساعة الحكم العسكري


 وانا مش ضد الاخوان لا انا ضد الفساد و الظلم تحت اي مسمي يعني عسكر ,فلول ,دخلية ,
مبارك ,طنطاوي ,قضاء ,اعلام ,اخوان وانا مش عايزة اشيل مرسي انا عايزة اشيل قاتل ايا كان مين عايزة مطالب الثورة تتحقق..



 الفرق اللي بنا وبنهم اننا بندافع عن قضية ومبادئ وهما بيأيدوا او بيعراضوا اشخاص !
الناس مش نازلة عشان فساد و ظلم ومطالب ثورة ماتحققتش (الا من رحم ربي) الناس يا نزله عشان بيكرهوا الاخوان ياما عشان مصالح و ركوب ع الثورة
و السؤال اليتيم اللي قاهرني كان فين الناس دي كلها من الطرفين كانوا فين ايام المجلس العسكري والمجازر اللي كان بيعملها كل شهر ؟تجزيئ المبادئ ده شئ حقير جدا بجد ..

وبدأتوا لحس بيادات من دلوقتي عشان هيخلصوكوا من الاخوان ؟...برافو
نسيتوا لما الجيش نزل كهرب الناس قدام مجلس الشعب ..نسيتوا كشوف العذرية ؟
نسيتوا اهالي الشهداء اللي اضربوا عند مسرح البالون ..نسيتوا المحاكمات العسكرية..برافو
نسيتوا عمرو البحيري و عصام عطا ؟
نسيتوا اعتصام 8.7 لما اتفض اول يوم رمضان ودخلوا المسجد بالبيادات وضربوا الناس؟
نسيتوا مينا دانيال لما دهسته المدرعة عند ماسبيرو ؟
نسيتوا علاء عبد الهادي و محمد مصطفي  والشيخ عماد في مجلس الوزراء..برافو
نسيتوا محمد محمود 1 و 2 ..نسيتوا احمد حراره و رضا ؟
نسيتوا اشهد يا محمد محمود كانز كلاب و كنا اسود ؟
نسيتوا شهداء الثورة؟
 آه صحيح مش دول إلي كانوا الشرطة قتلوهم و أخدوا براءة كلهم و متحكمش علي و لا واحد؟..طيب
برافو عليكوا...نسيتوا كل حاجة عشان نشيل شوية كلاب من السلطة فنجيب كلاب زيهم..
 يسقط عسكر جيش داخلية...يسقط حكم الإخوانجية!!

الناس فرحانه ان الجيش طلع بيان وهيعمل انقلاب ..طيب
انا هفضل قاعده في البيت لحد رحيل مرسي وبعدين لما تخلصوا احتفالات وتروحوا بيتكوا
هنزل اهتف "يسقط يسقط حكم العسكر" و "الداخلية بلطجية"

(اتنين ملهمش امان العسكر والاخوان )..ولا نسيتوا دي كمان 

ثم دارت اللمونة

دورة كاملة......ثم داخت

ثم جه إخوانّا و لامونا

ثم ان الثورة باخت

ثم هما هما برضه
اللى باعوا الطول و عرضه
يصحوا يتخانقوا و يعارضوا
ثم إن الريحة فاحت
ثم مش نازلين معاكوا
ثم إن الجيش حمونا
... ثم قال حنزل لوحدى 
ثم دقن ف كل حتة
ثم يعمل مليونية
ثم يمشى الساعة ستة
ثم يعمل فيها عنتر
ثم ياخد علقة سخنة
ثم حيخزوقنا عسكر
ثم يطلع من نافوخنا
ثم دارت اللمونة 
دورة اكبر ...ثم دخنا
ثم فجأة الكل يتعب
ثم إن الجيش حيقتل
ثم إحنا حمارنا يغلب
ثم جيم الدومينو يقفل
ثم مصر عاوزة زقة
ثم ناس ما تقولش لأه
يركبوا ع الثورة تانى
ثم نخسر.....ثم نكسب

*مصطفي ابراهيم